حلم جديد

أزيكم أعرفكم بنفس انا إسمي .. مش مهم الإسم أنا بنت مصرية .. أكبر أخواتي لكن عمري ما حسيت إني أكبرهم مش مهم السن في مجتمعاتنا الأهم هو النوع يعني أنا لازم أسمع كلامهم على طول الخط عشان أنا بنت "لو قلت لبابا ميصحش أخويا الصغير يكلمني بالطريقة دي ألاقيه يقولي " أخوكي وليه الحق عليكي " ولو قلتلهم وناقشتهم بصفتي كأن حي له شخصية يقولولي " اسكتي بلا قلة أدب " !!

لو حبيت أروح رحلة يقولولي لأ ...وفي نفس اليوم أخويا يكون بيحضر شنطته عشان مسافركام يوم مع أصحابة !!آآه الجديد بقى ان متقدملي عريس..هو أنا لسه صغيرة يادوب عديت العشرين لكن ماما وخالتي خايفين عليا من لقب " عانس "وأهو بيقولولي " ضل راجل ولا ضل حيطة " اسمحولي بقي اصرخ وأقول " دي مبقتش عيشة " !!

نفسي بقي اتكلم مع ناس يفهموني يتكلموا مرة مع عقلي ..يعاملوني ككيان مستقل بذاته بيفكرويحس ويحلم ويا سلام لو ألاقي بنات ..عايزة أروح مكان كله بنات بس يمكن يبقي " كافيه بنات"...نفسي نتكلم هناك كل الكلام ونحكي كل الحكايات مش مهم حتى لو كانت " افتكاسات " !

أمشي في الشارع ألاقيني عايزة استخبى من عيون الناس ...ساعات بحس اني بتعاقب لأني اتولدت بنت...لو ركبت تاكسي ألاقي السواق بيبصلي في المراية....لو شوية زحمة ألاقي الناس ما بتصدق تلزق فيا آه نسيت "أنا بنت " ..حتي الجامعة ولا كأني ماشية على ناصية شارع كلام وغمزات "حاجة تقرف "...لو جت بس الفرصة هصرخ وأقولهم " طظ فيكوااااااااا ".

حتى الولد اللي افتكرته بيحبني وقعد يبني في قصور وانه هيعمل ويسوي الهوايل طلع لا بيحب ولا عنده قلب أساساً...بيحب بس يتسلى وأديني أهو شايفاه ماشي قدامي معاه "البنت الجديدة "بس أنا خلاص إتعلمت وبعد كده شعاري في الحياة " مش كل الطير "..

ساعات بحس إني مجنونة ...أو يمكن الدنيا حواليا هي اللي مجنونة "مش عارفة " مش عارفة أنا صح ولا غلط ..أنا عندية "زي ما بيقولوا" ولا عاقلة زي "ما أنا فاكرة " صحيح أنا مترددة بالشكل ده؟!لا لا أنا شخصية سوية بالنسبة لبنات كتير أعرفهم ...على الأقل أنا مش مغرورة ولا مسيطرة أو.....ياااااااه شكلي هكتب " يوميات بنت سيكو".

أنا رافضة حاجات كتير في المجتمع ...بحب أفكر في كل حاجة ...ودي نقطة خلافي مع ناس كتير حواليا بيقولوا عليا إني بجادل وخلاص " يعني لما حد يقولي "اقرصي العروسة في ركبتها هتحصليها في جمعتها " أو لو حامل أوعي يدخل عليكي راجل لسه حالق " أو أوعي تفتحي المقص بليل أحسن بيجيب الفقر "يبقي أنا كده بجادل؟! " يا سلااااااااام "

أما انا امبارح عرفت وصفة أكل جديدة حلوة وسهلة ...عملتها وأكلتها لوحدي عشان محدش من عيلتي يتريق عليا... واحدة صحبتي وصفتهالي وقالت لي " بس جربيها ".

بحلم بحاجات كتير...حاجات كتير مضايقاني في بلدي ...حاجات نفسي تتحقق ..ومش عارفة إمتى؟!! ومن كتر ما ذهقت قلت أحققها في أحلامي وكتير بحكيها لأصحابي وبعد ما أخلص أقولهم انتوا صدقتوا ده "كده وكده " !

" اللهم أجعله خير " حلمت امبارح حلم ومش عارفه تفسيره إيه ، حلمت إني في قاعة كبيرة مع كل صحباتي وبنتناقش مع " أهالينا " مناقشة موضوعية حضارية وسمعت صوتي بيقولهم اسمعونا قبل ما تسمعوا " مصايب بنات " !تعرفوا أحلى ما في الحلم إيه؟؟ انه "بنات وبس

ملحوظة : أي تشابه مع أحداث حقيقية ولو أي بنت شافت نفسها في كلام ده ..هذا ليس من قبيل المصادفة وانما مقصود مية في المية

استنونا على:

http://www.banat9bas.net/

محدش عايز 38 جنيه سلف !

جرس التيفون :

بعد السلامات والحركات...

مروة مش أخدت انهاردة العلاوة الاجتماعية ..

طيب هايل مبروك يا حبيبي.

هههههه طيب مش تسأليني كام؟!

كام ياتري؟؟

38 جنيه.

طيب وزعلان ليه ده مبلغ هايل ربنا يخليلنا الريس كتر خيره والله.

:s

كده بقي ممكن نفتح شوية في الفرح ونزود البوفيه يلا خلي الناس تاكل وتنبسط !

ههههههه اه كده كمان هعرف أظبط العربية بدل ما كنت مأجل شوية عشان مصاريف الجواز ...

لا خلاص بقي دي فرجت وهنجيب كل الحاجات اللي ناقصانا.

يااااه كده نجيب الشقة بقي بدل الشقة البعيدة دي..

آه ونسافر نقضي شهر العسل بره...

لا لا خلينا هنا في بلدنا أهو نشجع السياحة الداخليه ماهو مش عشان ربنا فتحها علينا نطلع بره..

طيب وياريت كمان بقي تحطلي قرشين في البنك باسمي أهو برضه ينفعوني !

لااااا ايه الطمع ده شكل الفلوس هتغيرك :))

لاااا.... ولا كل علاوات الدنيا تغيرني يا حبيبي.

أه نسينا حاجة مهمة.

ايه؟؟

نتبرع بجزء للغلابة !

اه طبعا وماله لازم برضة نحس بالناس مش عشان خلاص بقى معانا فلوس !

طيب ماشي يلا بقي ننزل نجيب كل حاجة سجاد وستائر وباقي الاجهزة..

اوكي واهو بالمرة نعدي ندفع باقي فلوس العفش.

طيب طيب وتعزمني على العشا وندخل سينما.

اه صحيح انتي نسيتي اننا لاسه بنجهز الشقة دهانات وسيراميك وحركات .

لا لا انت كده قديم قوي شوف احنا نروح لأكبر شركة ديكور وهما يتولوا الأمر..احنا هنوجع دماغنا ليه نديهم قرشين ونستلم الشقة جاهزة في الاخر.

أه أريح برضه.

بصراحة يا جماعة احنا مش عارفين نجيب بيهم إيه ولا إيه وبصراحة ده وجع دماغ محدش محتاج 38 جنية سلف ويريحنا !!

سنوات التحدي بس مش تحدي "الملل " !!

من فترة قليلة جبت mp3عارفة طبعاً انه مش حاجة جديدة ومجبتش التايهة وكمان ده أنا متأخره قوي و في حاجات أحدث منه لكن لأني بنوتة مش ديجيتال جبته وكمان مش رفاهية ده لأني هستخدمه في شغلي...عامة مش موضوعنا..

أثناء شرائي لهذا الجهاز الفظيع حرصت أن يكون به امكانية سماع الراديو فبالاضافة الي انني مش ديجيتال أنا بحب كل حاجة قديمة ..بحب الأفلام الأبيض وأسود...بحب أسمع برامج الراديو حتى ولو ظلت كما هي كما كنت اسمعها منذ كنت طفلة ..ولم يمسسها أي من أشكال التطور الأعلامي سواء في المضمون أو المذيعين "الحقيقة ده اللي عاجبني فيها " لأنها بتفكرني بأيام حلوة كتتيير !! ده برضة مش موضوعنا ...

بعد ما خلصت الشغل ونزلت قلت اسمع شوية راديو أفصل عن ضغط الشغل وأفتكر أيام زماان ....وقعدت أدور بين الترددات لحد ما لقيت مسلسل إذاعي ...اه حلو قوي أنا أعشق المسلسلات الإذاعية بتخليني شوية اشغل مخي وأتخيل شكل ومكان الأحداث ...

ولكن للأسف ملحقتش المسلسل من أوله كان أول حوار سمعته بين أم وأبنها بيحكيلها عن نشاط بيعمله للشباب وإيمانه بدور الشباب واننا لازم نوفرلهم مكان يطوروا فيه نفسهم ...وكمان بيحكيلها عن الحزب اللي هو أحد أفراده..
وترد الأم "بطريقة مصرية قوي : يعني انت على طول كده بين الحزب والجمعية ....يبني متنساش نفسك انت شاب برضه !!
يرد عليها : يعني أعمل إيه هو أنا عشان شاب يبقي ارقص واطنطط !!!
الأم : لا يا حبيبي مش قصدي بس مش عايزة الحكاية تسرقك !
الأبن : قصدك يعني الجواز !!
الأم : يبني انا أنا صحيح مرات رئيس الجمهورية لكن أنا في الأخر أم ونفسي اشوفك متجوز !!

هنا عرفت أنا بسمع إيه .... مسلسل إذاعي عن الرئيس مبارك ...مصدقتش نفسي قلت لنفسي ياترى أيه أهمية المسلسل ده !! أنا عارفة طبعا هدفة المستتر !!! لكن أنا عايزة أعرف هدف أذاعته لو أحد المستمعين سأل " ليه " هل هيقوله " لأن الناس شايفة انجازات مبارك فجميل اننا نعرض حياته في مسلسل " !!! "أو مثلا " لتأثيره الأنساني في حياة شعبه " فالناس هتحب تعرف كل حاجة عن حياته- اللي كلنا عارفينها - !!! "أو مثلاً لحب الناس للريس " فده هيزود نسبة الإستماع !!!

أنا مش قصدي حاجة واللهي يا جماعة – اوعى تفهمني صح- أنا عارفة اننا في العصر المباركي وحلو أننا أسمع مسلسل عن حياته الحافلة بالأنجازات خاصة الأيام المزهزهة اللي احنا عايشينها .

لكن المسلسل ده كان هيبقي أوقع لو كان مسلسل عادي عن حياة رئيس مش موجود في الواقع – وياسلام لو ريسنا يسمعه ويقلده !!

ياسلام لو عندنا رئيس زي اللي في المسلسل بيكلم أعضاء حكومته بحرقه على أوضاع البلد وبيكلمه عن شخص معين..مواطن فقير – قابله صدفه وصعب عليه وأمر انه يبعتله تلاجة !!!

يعني في المسلسل الريس كان ماشي عادي وسط الناس من غير ما الشارع "قبلها بكام ساعه "يفضى ويتنضف من الزبالة والناس على حد سواء ..الريس وقف واتكلم مع مواطن عادي كده وسأله عن أحواله – والمواطن – اللي اسمه مينا – روح مزقطط لمراته وقالها ان مبارك بنفسه وقف وسلم عليه وصعب عليه انه واقف في الشمس بيبيع وقرر انه يساعده ..ولما روح بيته وحكي لمراته اتهمته طبعا ًبالجنون !!
لحد ما التلاجة وصلت البيت وقالها صدقتي ، مش مصدقة ليه ده الريس شخص حاسس بشعبه !!!!!!!! علامات تعجب لأخر العمر.
سعادة الرئيس أنا بنت مصرية وبقولك أنا مكنتش محتاجة مسلسل عن حياتك و في الوقت ده بالذات ...كنت أتمني اني أخويا اللي مسافر بره يشتغل يرجع وهو ضامن انه هيلاقي هنا نفس أمكانيات بره ... كنت أتمني أشوف أختي سعيدة مع جوزها اللي اضطر هو كمان يسافر يشتغل ومستحملين بعدهم عن بعض ..
كنت أتمني إن جارتي تلاقي فرصة للعلاج على نفقة الدولة بدون أن تقف طوابير لحد ما حالتها اتدهورت .. كنت اتمني ان حضرتك تدخل شخصيا في زمن سعر البيضة فيه 60 قرش ورغيف العيش "اللي بيتاكل " ب 30 قرش .. في وقت في موظفين مازالت مرتباتهم لا تتعدي ال 300 جنيه بالحوافز والعلاوات "بس يمكن مفيش واحد منهم اسمه مينا " !!

كنت اتمني ان نتيجة اضراب 6 ابريل متكونش اعتقال اسراء وغيرها ..كنت اتمني اشوفك في لقاء وبتقول فيه للناس انك مقدر اللي هما فيه وانك هتوصل لحل بأقصى سرعة "بطريقة المسلسل " !!!
كنت أتمني ان تصريحاتك يوم عيد العمال متكونش تقرير علاوة اجتماعية 30 % وبعدها بكام يوم زيادة أسعار في كل حاجة ، يعني لو كلنا "مينا " كنا هنصعب عليك !
كنت أتمنى انك تطلب عمل لقاءات مع شباب الجامعات تسمعهم ، أو مع موظفين قطاعات مختلفة – وتشوف مشاكلهم - !!
أنا عارفه ان مستحيل شخص واحد يعمل كل ده لكن لو حاجة واحدة من الحاجات اللي بتمناها دي حصلت أكيد أكيد كنت هصدق المسلسل.


نقد هايل عن المسلسل وأبطاله
http://www.islamonline.net/servlet/Satellite?c=ArticleA_C&cid=1209357235308&pagename=Zone-Arabic-ArtCulture%2FACALayout

امسك...حرامي الأفكار

تخيل عندما تجد حروف كتبتها .. فكرة جالت بخاطرك. .. احساس أخرجته على الورق...ثم تجد كل هذا فجأة ينسب لشخص أخر...وساعتها تقول الحقوني انا اتسرقت...

مي حرحش..بنوتة من أجمل وأفضل محررات كلمتنا...مسئولة باب ورقة وقلم في كلمتنا...في فترة قصيرة تركت مي بأسلوبها الأدبي المميز بصمة عند كل من قرأ لها... ايه مناسبة الكلام ده ؟!

اليكم الحوار الذي درا بينا وهتفهموا كل حاجة !!

مي : عارفة خاطرة كاذبات اللي اتنشرت في عدد ديسمبر من كلمتنا.

أه طبعاً دي كانت حلوة قوي

مي : تعرفي ان واحده خدتها ونشرتها على البلوج بتاعها باسمها.

ايه ده بجد ؟!

مي: مش بس كده ..دي الناس داخلة تشكرها على فكرتها الجامدة وانها موهوبة وهي بتشكرهم على شعورهم اللطيف :S

طبعاً حاولت أن أقوم بتهدئة مي..لكن أنا من جواية بغلي...فأنا أعرف شعور أي فرد عندما تسرق فكرة له أو موضوع..فأنا جربت مثل هذا الشعور من قبل عندما وجدت موضوعاتي منذ فترة على موقع "شباب وطني " دون الاشارة لمصدر الموضوع ..وكان النقل وهي الوصف الأقل حدة من "سرقة "كان من موقع الجريدة الذي أعمل بها على الانترنت أي النقل كان أون لاين.

لكن مع مي الموضوع مختلف لأن النقل كان من المجلة "كلمتنا" يعني حتى السرقة "غبية " لأن كلمتنا شباب كتير بتقراها فكان أكيد هيتعرف ..لكن نقول إيه ؟!للأسف لصوص الأفكار ما أكثرهم هذه الأيام ...

ولمي : معلش يا مي دي ضريبة الشهرة .

خاطرة مي نشرت في كلمتنا في عدد ديسمبر 2007

وده لينك صاحبة المدونة اللي نسبتها لنفسها :

"حذفت اللينك لطلب صاحب المدونة اللي اعتذر ووحذف الخاطرة اللي وضعتها زميلتة دون أن يعرف انها مسروقة

لكن مش همسح البوست عشان يفكر كل واحد يفكر انه ينسب لنفسه عمل غيره"

خد بالك من الخط الأحمر ....ده تحذيييير !

في حياتنا خطوط حمرا كتير ...وده معناه ان في مناطق ممنوع نقرب منها ...انهاردة الصبح اكتشفت خط أحمر جديد في بلدنا وبالتحديد في مترو الأنفاق !!

والخط الأحمر ده للرجال ممنوع يعدوه .. اللي يعديه ياويله و يا سواد ليله ..أول أما يعدية هيلاقي صراخ في وشه وستات مستغربة "راجل... راجل " وتصرخ في وجه "العربية دي سيدات يا استاذ " ده غير نظرات الاستحقار والقرف والاشمئزاز وكأنه هياكلهم أو مشافوش راجل في حياتهم وهنا قد يعتقد المأسوف على منظره أنه دخل حمام سيدات وليس مجرد عربة مترو سيدات وقد ينزل المحطة القادمة !!

ده غير بقي تهديده بالغرامة "لو منزلتش هيغرمووك " وتلاقيه ياعني بيتلفت حواليه وبيتمني يختفي خمس دقايق أوالمترو ينشق ويبلعه وهوبيبص يلاقي نظرات الستات وانه لوحده وسطهم !
ويمسك في اخر باب في العربة وبيدعي ربنا يعدي اللحظة دي على خير وينزل ويروح لبني جنسه عشان ميحسش بالغربة !

ايه حكاية الخط الأحمر؟!

الخط الأحمر ده علامة على الرصيف مكتوب عليها سيدات أمام العربة المخصصة للسيدات وده عشان توضح للناس مكان العربة الجديد الذي انتقل لوسط القطار بدلأً من العربة الأولى والثانية !

وليه قرروا ينقلوا مكان عربة السيدات ؟!

والله مش عارفه أنا اتفاجأت لكن الناس بيقولوا انه عشان الحادثة اللي حصلت وان الستات هما السبب فيها وان السواقين دايما بيشتكوا من صوتهم العالي وصراخهم وانهم كتير بيخبطوا عليه وده اللي حصل فى حادثة المترو الاخيرة ..وده اللي لخبط السواق وخلاه يدوس على زرار غلط وزود السرعة وحصل اللي حصل!!
واللهي أنا بنت لكن الحق يقال انا كتيير بيصعب عليا السواق لما كل واحدة تخبط عليه تشتكيله من بياع ولا تقوله "افتح الباب بتاعك دخل صاحبتي " أو واحدة تصرخ "ابني ..ابني هتقفل عليه !!( :

خناقة لكن كوميدية !

كعادتي فى المترو مبنشغلش باللي حواليا بكون مركزة فى حاجة بقراها لكن اليوم ده كان مختلف من المواقف اللي كانت بتحصل لما كل واحد يركب العربية غلط ويقوم نازل يدعي على الستات واحد يقول "ربنا ياخدهم " وواحد تاني يقول "انتوا سبب كل البلاوي " وواحد تاني يقول "ماتقعدوا في بيتكم وتريحونا !! "
أطرف حاجة لما واحد صرخوا فى وشه قام قايل "طيب على الله ألاقي حد منكم في عربية رجالة !!!!!" كمان تهديد !!!:)
باقول لهيئة المترو انهم عملوا فتنة بين الرجالة والستات ومش بعيد بكرة نلاقي مظاهرات استعدوااااااا .

ده بقى لعب عيال !

المترو فتح بنت ركبت وقامت شايفة راجل بيركب معاها فى نفس الوقت قامت قايلة بزعيق انزززززل الناس استغربت من طريقتها العدوانية ..قامت قالتلهم " ايوة خلوه ينزل دول الرجالة لما ركبت العربية التانية ضحكوا وقالولي مبقتش عربية سيدات هاهاهاها ....
وخناقة بقى بين البنت والراجل هي تقوله "متغاظين ليه " وهو يقولها "روحي شوفي المحزق اللي انتى لابساها ووووووو لحد ما المحطة جت ونزلوا الحمد لله !!!!

ركبت المترو حوالي 22 محطة وفي كل محطة يحصل نفس الموقف واحد يركب ويصرخوا في وشة ..يتلفت حواليه وتيجي المحطة اللي بعدها وينط منها يلحق يركب واحدة تانية وعلى نفس الحال لحد مانزلت ...والحقيقة لما نزلت كنت خايفة كنت حاسة ان الرجالة على اخرهم هيقوموا يضربوا كل اللي ينزل لكن الحمد لله عدت على خير !!!

انت خاين وجاسوس وعميل

تم القبض عليه من وسط عائلته...جردوه من ملابسه أمام جيرانه...اهين امام اولاده..لا يعرف تهمته...تعذب في قسم الشرطة...قدم شكاوى لكل الأجهزة في بلده...لا احد يسمع...لا احد يهتم..."هذا على حد قوله" ...اقفلت الابواب أمام وجهه...لم يهتم به أحد الا عندما تقدم بطلب لجوء سياسي بالسفارة الاسرائلية...

وهنا بدأ الموضوع رأيناه على شاشة التليفزيون هو وكثيرون مثله ممن لجأوا للسفارة ...ننظر لهم كمتهمين ..كل منهم له حكاية وظروف مختلفة ... حاجة تلغبط..لا نعرف هل نتعاطف معهم...مهو برده كل واحد له حكاية أصعب من التانية ...لكن أيضاً لا نستطيع أن نتفق معهم دي برده اسرائيل ...

سألت نفسي" اذا لم يلجأ لاسرائيل " لم أكن سأشاهده الأن في برنامج الحقيقة ......هل اذا وجد من يسمعه ...من يأخذ له حقه...من يرد له اعتباره "كما أراد " هل كان سيتصرف بنفس الشكل "

ليه أول ما حد يفكر يروح اسرائيل .. تبقي دي المشكلة فى حد ذاتها وننسي كل المشاكل اللي بتخليه يعمل كده.

ضمن ضيوف البرنامج كان في لواء شرطة ..طبعا كان في موقف المهاجم وزي كل مسئولين بلدنا بيقولوا فكرة التعذيب التى تعرض لها دي حاجة فردية ودي مش مبرر.

انا مش مع حكاية التبرير لكنى كنت انتظر منه أن يقول اننا لازم نحل مشاكل كتير في بلدنا وبعد كده نحاكمهم... وان الحكايات دي مش فردية لازم نعرف ايه اللى يخلي اكتر من 20 ألف مصري يشتغلوا فى اسرائيل .. وايه اللى يخلي عشرات يلجأوا سياسياً للسفارة الإسرايلية.

لكن المستفز هو ما قاله سيادة اللواء في نهاية البرنامج وهو" ضرورة تكاتف أجهزة الإعلام ومؤسسات المجتمع المدنى لتعزيز مفهوم الإنتماء لدي المواطن المصري "

هي دي بقت الفكرة...ان المواطن المصري " الناكر للجميل " معندوش انتماء وانه خاين وعميل ...مسمعش احد ضيوف البرنامج ممن لجأوا لاسرائيل وهو بيقول "البلد مبقتش بلدنا " احنا بقينا مستعبدين مش مواطنين " اي بلد تانية هتعاملنا احسن من بلدنا " .

اختلطت المفاهيم ..مين الغلط ومين الصح ...ده مبرر؟! ...لا يعنى هو ملقاش غير اسرائيل ؟...اهي وسيلة ضغط استخدمها ...محدش يلومه مهو تعب في بلده ... لأ مهو كتير عايشين عندهم مشاكل اشمعني هو يعني.؟ يارب أكون بحلم

اللي بني مصر كان في الأصل حلواني

اللى بنى مصر كان فى الاصل حلوانى،جملة كلناعارفينهاكمان في اغنية ايضا تكمل "وعشان كده مصر يا ولاد حلوة الحلوين"
بصراحة لا اعرف اصل هذه المقولة وفكرت كثيرا فيه هل فعلا من بنى مصر كان حلوانى؟! لم اعرف حتى الان ولكن ما عرفته ان المصريين متمسكين جدا بتلك المقولة لاتندهش فهذا عن تجربة.
بإحدى المرات ركبت تاكسى و جلست مصادفة بجوار السائق ومررنا بلجنة فقال لى" ياريت حضرتك تحطى حزام الامان مش لازم تتعبى نفسك وتقفليه بس حطية كده" !!وعندما اندهشت واسألة ليه،يقول" دى حاجة حلوانى كده عشان محدش ياخدنى مخالفة"!!طيب وهيتعب نفسة لما يركب الحزام واهو امان ايضا، يلا مش موضوعنا خلينا فى الحلوانى.
اكون فى الكليه بخلص ورق معين ومحتاجة دمغات بجنية مثلا،وعندما ادوخ اجد العامل يبيع الدمغات ويطلب منى 5 جنية"واذا تجرأت وسألته ليه بيبعها بالسعر ده" يقولى دى حاجة حلوانى كده خلينا ناكل عيش"!!
فى مرة ذهبت لإستقبال قريبة لى بالمطار،وهى منقبة،وقالت لى أن موظف الجوازات طلب منها أن تكشف وجهها حتى يتبين من الصورة ،وإضطرت أن توافق حتى تنتهى الإجراءات سريعا،فقلت لها" معلش مهو لازم يتأكد برضه من شخصيتك" إلا أننى فوجئت بها تقول" لكن الحمد لله طلع كويس ولم ينظر لوجههى" قلت"طيب وليه بقى طلب منك كشفة" فصعقتنى بالجواب" قالى دى حاجة كدة حلوانى ،إحنا عندنا اخوات برضه!!"
أدخل أنا وأصدقائي السينما فأجد أحدهم يدفع للعامل الذي يدخلنا "جنيهان" فأسأل "طيب وليه؟! هو عمل ايه يعني يقولوا "دي حاجة حلواني كده عشان يظبطنا فى المكان :S
مش عارفة ليه بقت كل حاجة حلواني..اللى بيذاكر حلواني واللى بيكدب حلواني ..واللي بيشتغل حلواني...