في حياتنا خطوط حمرا كتير ...وده معناه ان في مناطق ممنوع نقرب منها ...انهاردة الصبح اكتشفت خط أحمر جديد في بلدنا وبالتحديد في مترو الأنفاق !!
والخط الأحمر ده للرجال ممنوع يعدوه .. اللي يعديه ياويله و يا سواد ليله ..أول أما يعدية هيلاقي صراخ في وشه وستات مستغربة "راجل... راجل " وتصرخ في وجه "العربية دي سيدات يا استاذ " ده غير نظرات الاستحقار والقرف والاشمئزاز وكأنه هياكلهم أو مشافوش راجل في حياتهم وهنا قد يعتقد المأسوف على منظره أنه دخل حمام سيدات وليس مجرد عربة مترو سيدات وقد ينزل المحطة القادمة !!
ده غير بقي تهديده بالغرامة "لو منزلتش هيغرمووك " وتلاقيه ياعني بيتلفت حواليه وبيتمني يختفي خمس دقايق أوالمترو ينشق ويبلعه وهوبيبص يلاقي نظرات الستات وانه لوحده وسطهم !
ويمسك في اخر باب في العربة وبيدعي ربنا يعدي اللحظة دي على خير وينزل ويروح لبني جنسه عشان ميحسش بالغربة !
ايه حكاية الخط الأحمر؟!
الخط الأحمر ده علامة على الرصيف مكتوب عليها سيدات أمام العربة المخصصة للسيدات وده عشان توضح للناس مكان العربة الجديد الذي انتقل لوسط القطار بدلأً من العربة الأولى والثانية !
وليه قرروا ينقلوا مكان عربة السيدات ؟!
والله مش عارفه أنا اتفاجأت لكن الناس بيقولوا انه عشان الحادثة اللي حصلت وان الستات هما السبب فيها وان السواقين دايما بيشتكوا من صوتهم العالي وصراخهم وانهم كتير بيخبطوا عليه وده اللي حصل فى حادثة المترو الاخيرة ..وده اللي لخبط السواق وخلاه يدوس على زرار غلط وزود السرعة وحصل اللي حصل!!
واللهي أنا بنت لكن الحق يقال انا كتيير بيصعب عليا السواق لما كل واحدة تخبط عليه تشتكيله من بياع ولا تقوله "افتح الباب بتاعك دخل صاحبتي " أو واحدة تصرخ "ابني ..ابني هتقفل عليه !!( :
خناقة لكن كوميدية !
كعادتي فى المترو مبنشغلش باللي حواليا بكون مركزة فى حاجة بقراها لكن اليوم ده كان مختلف من المواقف اللي كانت بتحصل لما كل واحد يركب العربية غلط ويقوم نازل يدعي على الستات واحد يقول "ربنا ياخدهم " وواحد تاني يقول "انتوا سبب كل البلاوي " وواحد تاني يقول "ماتقعدوا في بيتكم وتريحونا !! "
أطرف حاجة لما واحد صرخوا فى وشه قام قايل "طيب على الله ألاقي حد منكم في عربية رجالة !!!!!" كمان تهديد !!!:)
باقول لهيئة المترو انهم عملوا فتنة بين الرجالة والستات ومش بعيد بكرة نلاقي مظاهرات استعدوااااااا .
ده بقى لعب عيال !
المترو فتح بنت ركبت وقامت شايفة راجل بيركب معاها فى نفس الوقت قامت قايلة بزعيق انزززززل الناس استغربت من طريقتها العدوانية ..قامت قالتلهم " ايوة خلوه ينزل دول الرجالة لما ركبت العربية التانية ضحكوا وقالولي مبقتش عربية سيدات هاهاهاها ....
وخناقة بقى بين البنت والراجل هي تقوله "متغاظين ليه " وهو يقولها "روحي شوفي المحزق اللي انتى لابساها ووووووو لحد ما المحطة جت ونزلوا الحمد لله !!!!
ركبت المترو حوالي 22 محطة وفي كل محطة يحصل نفس الموقف واحد يركب ويصرخوا في وشة ..يتلفت حواليه وتيجي المحطة اللي بعدها وينط منها يلحق يركب واحدة تانية وعلى نفس الحال لحد مانزلت ...والحقيقة لما نزلت كنت خايفة كنت حاسة ان الرجالة على اخرهم هيقوموا يضربوا كل اللي ينزل لكن الحمد لله عدت على خير !!!
16 comments:
جربي مرة اركبي العربيه اللي بعد عربيه الستات وانتي تتفرجي هناك خطو ط بكل الالوان بس دة ميمنعش ان فيه ستات بطلع زهقها من جوزها في اي غلبان يركب غلط
هههههه لا مش هجرب بخاف بصراحة وانا بركب مسافة طويلة
شكرا على تعليقك
وزيارتك مدونتي
المشكلة بقى حكاية تغيير العربات دى لخبطت الدنيا ودايما الواحد يركب ويحصل اللى انتى قلتى عليه ده , النكتة بقى ان العربية الأولى والتانية بتبقى شبه خالية من الركاب لأن رجالة كتير ماتعرفش حكاية التغيير دى
وتحياتى
انا بصراحة اتفاجأت برضو زيك بموضوع تغيير العربية والذ حاجة لقيت كل الناس عمالة تسئل ليه التغير المفاجئ ده قالو يمكن عشان يريحونا وكدة احسن نلاقى نفسنا قصاد السلم على طول وفيه ناس اخدتها بتريقة قال يريحونا قال
بس بجد منتهى الفوضة يمكن انتى بتصادفى رجالة بترضى تنزل انا بقى بصادف ناس تنحة بجد وكمان اللى يغيظ ان الدنيا بقت فوضى بليل مبقاش فيه حاجة اسمها عربية سيدات والناس تطلع ونقولهم يا اخوانا دية اصلا سيدات ولا حياة لمن تنادى طيب مش مشكلة ما انتو بتركبوا ويانا فى العربيات التانية وحاجة آخر هزق مرة بنت كلمت راجل كبير بعمة كدة ردت عليه اينعم بطريقة مش حلوة بس هوا التانى شجع الرجالة التانية انهم يفضلوا قاعدين بعد ما كان اغلب الرجالة هينزلوا ويركبوا فعلا العربيات التانية وللاسف العيب مش على الناس العيب على ادرة المترو والعساكر اللى شايفة وساكته وعادى جدا وبقى بليل او حتى بالنهار منتهى الفوضى مبقاش فيه استقلالية ورجالة فى منتهى قله الزوق
يلا ربنا يرحمنا برحمته
اولا .. آسف أشد الاسف اني بقالي كتير مدخلتش مدونتي المفضلة ..
ثانيا : الموضوع ده جامد جداااا بجد برافو عليكي ياميرو ..
بس بجد انا شايف انهم المفروض لا يبقى في خط احمر ولا حتى اخضر وكل العربيات تبقى زي بعضها لسببين :
1. لتلاشي الفتنة الي هتحصل قريب جدا بين كل الستات والرجالة
2. لان اصلا الستات كده كده مسيطرين على كل حاجة في البلد يامروة هتركبي عربية سيدات او حتى رجالة هتلاقي برضه السيدات هم اغلب الركاب ..
فعادي يعني ماجتش على المترو .. ولا عايزين كمان اتوبيس سيدات وميكروباص سيدات .. بجد تبقى حاجة جامدة آخر حاجة
وسلملي على الديمقراطية والحرية والمساواة
:):)
أحمد نشأت
امبارح كنت راكبه المترو بليل وطبعا بليل مبقاش فيه عربية دايمة للسيدجات ولا غيرو خلاص الفوضى حلت بنت قعدت تقول للرجالة اللى طالعة لو سمحت دية عربية سيدات فيه ناس كتير قامت فعلا عشان تنزل تغير المحطة اللى جاية فا قلت اقول وياها مهو برضو لازم نشجع النظام بقول لواحد صعيدى لو سمحت دية عربية سيدات قالى اشمعنى انا قولتول بس ده المفروض وناس كتير قامت اهو قالى المفروض ده فى مصر وضحك يا سيتى جت على دية قالى المفروض ان لو لقيت واحدة ست اقوملها لكن موضوع النظام فى مصر دية الظاهر بقت نكته ولا ايه المهم فعلا الرجل كل ما يشوف واحدة ست يقوم تقريبا مقعدش طول الطريق لحد ما نزل
شوفتوا تطبيق النظام والناس بتساعد فى اتباع التعليمات ازاى بكل دقة
:)))) طبعا نكته
وعجبى
اسلوبك فى التناول يتسم بالبساطة والموضوعية.. سعيد بمعرفت مثل هذه المدونة
ـــــــــ
عندما علمت بالخبر من قترة لا بأس بها
قلت فى نفسى هكذا يفعل طانعو القرار عنما يبغون صناعة الفوضى ..وخاصة الفوضى المبررة
ــــ
لكى تحياتى
كمال سلطان
شكرا على تعليقك لكن على فكرة العربية الاولي والثانية بتبقي مليانة على أخرها "متغاظين بقى ومكبوتين ":))))
رحيق الحب
ايه يا هالة ده شكلك شايلة فى قلبك قد كده :)) اكيد في ناس قليلة الذوق كتير سواء رجالة أو ستات مبقناش بنعرف نتعامل مع بعض بهدوء
الاظرف بقى يامروة لو بنت ركبت العربية اللى جنب عربية الستات
انا امبارح كنت راكبة العربية دى وكان معايا بنت كمان
ولقيت راجل كبير قعد يقنع فيها ان عربية الستات فاضية خالص انتوا ليه راكبين هنا
وكان فاضل ياخدها من ايديها يركبها هناك
طبعا انا ماكلمنيش لانى ركبت بعدها وكنت جيت فى نص الحوار فاتكلم كلمتين وسكت ياعينى
تعب
الرجالة هتفرقع خلاص
حسسونى وانا راكبة انى داخلة بيتهم مش راكبة عربية مترو
أحمد نشأت تصدق فعلا هضربك زي ما قلت
:))
بلاش بقي تتكلم بالطريقة دي يعني مش خلاص عربية السيدات اللى خلت مفيش مساواة انا بنتقد الستات اللى بتطلع فى الرجالة يعني لما حد يركب غلط
لكن فى نفس الوقت العربية دي مهمة لواحدة مثلا بترضع او ساعات الزحمة
وبلاش بقي حقد :))
وتصدق فكرة ميكروباص سيدات دي جامدة جدا
على الاقل هضمن اني مش هعقد جمب واحد يحس انه قاعد لواحده فى الكرسي وواخد راحته على الاخر أو واحد بيستغل ان عنده عضلات ويلحق يركب الميكروباص وتلاقيه بيزيح كل واحد يفكر يركب من طريقه وده مهم فى عصر انعدام الجنتلة :)))
يلا كفاية غيظ فيك :p
رحيق الحب
ههههههه ومالك ومال الصعايدة يا هالة :))
انكسارات
شكرا لتعليقك شهادة اعتز بيها يافندم
هي فوضي لكن غير مبررة
sosa
الظاهر انهم هيعملوا فتنة فعلا هههههه
معلش بقي ماهو من اللى بيتعمل فيهم لما يجوا عربية الستات
شكرا على تعليقك
احب اقول لحضرتك ان اول مره عرفت فيها الحوار ده كنت تعبان اخر حاجه ولازم اركب علشان اروح و انا متعود انزل السلم وامشي ورا شويه ف الروقان
وصلت و لسه هاركب لقيت العسكري الاحمر...مشيت شويه و انا مش شايف قدامي و السكه طولت لحد ما المترو قفل و انا لسه ماشي جمب النصب التذكاري لعربيه السيدات و فاتني المترو المحترم و اتلطعت حبه كويسين عشان المترو اللي بعده بسببكم...الله يخرب بيتـ....المترو اللي قبله
ايه اللي خلاه يمشي اما غلطان صحيح
معلش اتاخرت في الرد عشان كنت مستني المترو اللي بعده...قصدي كان عندي امتحانات
ههههههه
انتي عامله اييييييييييه؟؟؟
هههههههه معلش يا سعودي تعيش وتاخد غيرها
المهم لحقت المترو؟
انا تمام وحشتنا جداااا يلا مستنينك في المجلة
هههههههههههه
اظاهر ان الستات هما فعلا سبب مساكل المترو عموما .. وبما انك واحدة من هن
.
.
احب اسالك
وارهم عليكي واستفزك واقولك
الا هو ايه كان سبب المشكلة اللي حصلت يوم الخميس اللي فات
24/1
ةاللي بسببها .. امتحاني اتاخر ساعه بحالها لان الدكتور طبعا رفض يبدا الامتحان وتلات تربع الدفعة مش موجوده
.
.
باختصار نت الساعه
11 صباحا ماكنش فيه مترو بيروح حلوان
ولو هتركبي من حدايق المعادي المفتش يقولك خدي بالك
لو رايحة المرج فان اول محطة هيقف فيها المترو هي الملك الصالح
.
.
وعدي اليوم .. ولا عرفنا اي حاجة ولا عرفنا المترو كان مالة
.
.
تعرفيش انت كان ماله ؟؟؟؟؟؟؟؟؟
وحشتني كتاباتك يا ميرو:d
فعلاً كتاباتك مميزه وتحليلاتك ممتازه ومتماشية مع الواقع
انا اول مره اترك تعليق هنا
اخوك عبدالمنعم المصري ارسل سلامي من الامارات
واحب ان ترين مدونتي فهي جديدة وليدة اليوم
http://freedom-egy.blogspot.com/2008/05/blog-post.html
إرسال تعليق