سنوات التحدي بس مش تحدي "الملل " !!

من فترة قليلة جبت mp3عارفة طبعاً انه مش حاجة جديدة ومجبتش التايهة وكمان ده أنا متأخره قوي و في حاجات أحدث منه لكن لأني بنوتة مش ديجيتال جبته وكمان مش رفاهية ده لأني هستخدمه في شغلي...عامة مش موضوعنا..

أثناء شرائي لهذا الجهاز الفظيع حرصت أن يكون به امكانية سماع الراديو فبالاضافة الي انني مش ديجيتال أنا بحب كل حاجة قديمة ..بحب الأفلام الأبيض وأسود...بحب أسمع برامج الراديو حتى ولو ظلت كما هي كما كنت اسمعها منذ كنت طفلة ..ولم يمسسها أي من أشكال التطور الأعلامي سواء في المضمون أو المذيعين "الحقيقة ده اللي عاجبني فيها " لأنها بتفكرني بأيام حلوة كتتيير !! ده برضة مش موضوعنا ...

بعد ما خلصت الشغل ونزلت قلت اسمع شوية راديو أفصل عن ضغط الشغل وأفتكر أيام زماان ....وقعدت أدور بين الترددات لحد ما لقيت مسلسل إذاعي ...اه حلو قوي أنا أعشق المسلسلات الإذاعية بتخليني شوية اشغل مخي وأتخيل شكل ومكان الأحداث ...

ولكن للأسف ملحقتش المسلسل من أوله كان أول حوار سمعته بين أم وأبنها بيحكيلها عن نشاط بيعمله للشباب وإيمانه بدور الشباب واننا لازم نوفرلهم مكان يطوروا فيه نفسهم ...وكمان بيحكيلها عن الحزب اللي هو أحد أفراده..
وترد الأم "بطريقة مصرية قوي : يعني انت على طول كده بين الحزب والجمعية ....يبني متنساش نفسك انت شاب برضه !!
يرد عليها : يعني أعمل إيه هو أنا عشان شاب يبقي ارقص واطنطط !!!
الأم : لا يا حبيبي مش قصدي بس مش عايزة الحكاية تسرقك !
الأبن : قصدك يعني الجواز !!
الأم : يبني انا أنا صحيح مرات رئيس الجمهورية لكن أنا في الأخر أم ونفسي اشوفك متجوز !!

هنا عرفت أنا بسمع إيه .... مسلسل إذاعي عن الرئيس مبارك ...مصدقتش نفسي قلت لنفسي ياترى أيه أهمية المسلسل ده !! أنا عارفة طبعا هدفة المستتر !!! لكن أنا عايزة أعرف هدف أذاعته لو أحد المستمعين سأل " ليه " هل هيقوله " لأن الناس شايفة انجازات مبارك فجميل اننا نعرض حياته في مسلسل " !!! "أو مثلا " لتأثيره الأنساني في حياة شعبه " فالناس هتحب تعرف كل حاجة عن حياته- اللي كلنا عارفينها - !!! "أو مثلاً لحب الناس للريس " فده هيزود نسبة الإستماع !!!

أنا مش قصدي حاجة واللهي يا جماعة – اوعى تفهمني صح- أنا عارفة اننا في العصر المباركي وحلو أننا أسمع مسلسل عن حياته الحافلة بالأنجازات خاصة الأيام المزهزهة اللي احنا عايشينها .

لكن المسلسل ده كان هيبقي أوقع لو كان مسلسل عادي عن حياة رئيس مش موجود في الواقع – وياسلام لو ريسنا يسمعه ويقلده !!

ياسلام لو عندنا رئيس زي اللي في المسلسل بيكلم أعضاء حكومته بحرقه على أوضاع البلد وبيكلمه عن شخص معين..مواطن فقير – قابله صدفه وصعب عليه وأمر انه يبعتله تلاجة !!!

يعني في المسلسل الريس كان ماشي عادي وسط الناس من غير ما الشارع "قبلها بكام ساعه "يفضى ويتنضف من الزبالة والناس على حد سواء ..الريس وقف واتكلم مع مواطن عادي كده وسأله عن أحواله – والمواطن – اللي اسمه مينا – روح مزقطط لمراته وقالها ان مبارك بنفسه وقف وسلم عليه وصعب عليه انه واقف في الشمس بيبيع وقرر انه يساعده ..ولما روح بيته وحكي لمراته اتهمته طبعا ًبالجنون !!
لحد ما التلاجة وصلت البيت وقالها صدقتي ، مش مصدقة ليه ده الريس شخص حاسس بشعبه !!!!!!!! علامات تعجب لأخر العمر.
سعادة الرئيس أنا بنت مصرية وبقولك أنا مكنتش محتاجة مسلسل عن حياتك و في الوقت ده بالذات ...كنت أتمني اني أخويا اللي مسافر بره يشتغل يرجع وهو ضامن انه هيلاقي هنا نفس أمكانيات بره ... كنت أتمني أشوف أختي سعيدة مع جوزها اللي اضطر هو كمان يسافر يشتغل ومستحملين بعدهم عن بعض ..
كنت أتمني إن جارتي تلاقي فرصة للعلاج على نفقة الدولة بدون أن تقف طوابير لحد ما حالتها اتدهورت .. كنت اتمني ان حضرتك تدخل شخصيا في زمن سعر البيضة فيه 60 قرش ورغيف العيش "اللي بيتاكل " ب 30 قرش .. في وقت في موظفين مازالت مرتباتهم لا تتعدي ال 300 جنيه بالحوافز والعلاوات "بس يمكن مفيش واحد منهم اسمه مينا " !!

كنت اتمني ان نتيجة اضراب 6 ابريل متكونش اعتقال اسراء وغيرها ..كنت اتمني اشوفك في لقاء وبتقول فيه للناس انك مقدر اللي هما فيه وانك هتوصل لحل بأقصى سرعة "بطريقة المسلسل " !!!
كنت أتمني ان تصريحاتك يوم عيد العمال متكونش تقرير علاوة اجتماعية 30 % وبعدها بكام يوم زيادة أسعار في كل حاجة ، يعني لو كلنا "مينا " كنا هنصعب عليك !
كنت أتمنى انك تطلب عمل لقاءات مع شباب الجامعات تسمعهم ، أو مع موظفين قطاعات مختلفة – وتشوف مشاكلهم - !!
أنا عارفه ان مستحيل شخص واحد يعمل كل ده لكن لو حاجة واحدة من الحاجات اللي بتمناها دي حصلت أكيد أكيد كنت هصدق المسلسل.


نقد هايل عن المسلسل وأبطاله
http://www.islamonline.net/servlet/Satellite?c=ArticleA_C&cid=1209357235308&pagename=Zone-Arabic-ArtCulture%2FACALayout